How to actively participate in a meeting

Career Advice 20 Mar 2020
How to actively participate in a meeting | Blog from New Day Jobs

အစည်းအဝေးတွေမှာ ဘယ်လိုပါဝင်ဆွေးနွေးမလဲ? 

ကုမ္ပဏီအစည်းအဝေးတွေမှာ ပါဝင်ဆွေးနွေးတယ်ဆိုတာက သင့်ကို လုပ်ဖော်ကိုင်ဖက်တွေ အထက်လူကြီးတွေက သတိထားမိသွားတတ်ပါတယ်။ ကိုယ်က အစည်းအဝေးမှာ ဘယ်လိုပြောဆိုတယ်ဆိုတာပေါ် မူတည်ပြီး သူတွေတွေ သင့်အပေါ်ထားရှိတဲ့ ထင်မြင်ချက်တွေ ပြောင်းလဲသွားနိုင်ပါတယ်။  အလုပ်နဲ့ ပတ်သတ်တဲ့ အစည်းအဝေးတွေအတွက် ကိုယ်က အဆင်သင့်ဖြစ်နေပြီး စည်းကမ်းချက်တွေကို လိုက်နာတယ်ဆိုရင် အစည်းအဝေးမှာ ကောင်းကောင်း ပါဝင်ဆွေးနွေးနိုင်မှာဖြစ်ပါတယ်။

၁။ အဆင်သင့်ဖြစ်နေပါ 

အစည်းအဝေးနဲ့ ပတ်သတ်တဲ့ အစီအစဉ်တွေကို ဖတ်ပြီး ဘာတွေဆွေးနွေးမယ် ကိုယ့်ဘက်ကကော ဘယ်လိုအကြောင်းအရာတွေကို ပြောမယ်ဆိုတာကို စဉ်းစားပါ။ အကယ်၍ အစည်းအဝေးက ပုံမှန် အပတ်တိုင်း ဒါမှမဟုတ် နေ့တိုင်းလုပ်နေကျ အစည်းအဝေးဆိုရင် အရင်နေ့တွေတုန်းက ဘာပြောခဲ့တယ်ဆိုတာနဲ့ ဘယ်လိုအကြောင်းအရာတွေကို ဆွေးနွေးခဲ့ပြီး ဘယ်လိုဆုံးဖြတ်ချက်မျိုးတွေ ချခဲ့တယ်ဆိုတာကို ပြန်ကြည့်ကြည့်လိုက်ပါ။ 

၂။ ချက်ချင်း အမှားထောက်ပြတာမျိုးမလုပ်ပါနဲ့

 အစည်းအဝေးမှာ ပြောနေတဲ့သူက မှားပြောမိတာမျိုးရှိခဲ့ရင် ကိုယ်က ချက်ချင်း မှားနေတယ်ဆိုပြီးပြောလိုက်တာမျိုးမလုပ်ပါနဲ့။ ကိုယ်က မပြောခင်မှာ အရင်စဉ်းစားလိုက်ပါ။ အကယ်၍ အဲ့ဒီအမှားက နောက်မှ ပြင်ခိုင်းလို့ရတယ်ဆိုရင်လည်း အစည်းအဝေးပြီးသွားမှ နှစ်ယောက်တည်းပြောလိုက်ပါ။  အကယ်၍ ချက်ချင်းပြောဖို့ လိုအပ်တယ်ထင်ရင်လည်း ကိုယ့်ရဲ့ အတွေးကတော့ ဘယ်လိုမျိုးဆိုပြီး ပြောပြလိုက်ပါ။ ဒါပေမယ့် သူပြောနေတုန်းမှာ စကားဖြတ်ပြောတာမျိုးမလုပ်ပါနဲ့။ သူပြောလို့ပြီးသွားမှ ပြောတာမျိုးလုပ်ပါ။ အဲ့ဒီလူက ကိုယ့်ရဲ့ လက်အောက်ငယ်သားဖြစ်နေပါစေ ကိုယ် သဘောမကျတဲ့သူဖြစ်နေပါစေ ကိုယ်က ပြောလိုက်ရင် အဲ့ဒီလူလည်း အရှက်ကွဲသလို ခံစားသွားရပြီး တခြားသူတွေကလည်း ကိုယ့်ကို တစ်မျိုးထင်သွားတတ်ပါတယ်။ 

၃။ ကိုယ့် အတွေးအခေါ်တွေကို မျှဝေပါ 

အစည်းအဝေးမှာ ကိုယ့်ရဲ့ အတွေးအခေါ်တစ်ခုမှမပြောပဲနေတာမျိုးမလုပ်ပါနဲ့။ ဘယ်လိုအစည်းအဝေးမျိုးပဲ ဖြစ်ပါစေ တခြားသူတွေကပဲ စကားတွေပြော အကြံဉာဏ်တွေဝေမျှနေပြီး ကိုယ်က ဘာမှမပြောပဲ ဒီအတိုင်းထိုင်နေရင် မကောင်းဘူးလေ။ နားမလည်တာတို့ မရှင်းတာတို့ရှိရင် မေးခွန်းလေးတွေမေးတာတို့ ကိုယ့်ရဲ့ ထင်မြင်ချက်တွေ အတွေးတွေ ပြောတာတို့ လုပ်သင့်ပါတယ်။ အကယ်၍ ကိုယ်ကတစ်ယောက်ယောက်ကို ချီးကျူးတော့မယ်ဆိုရင် တကယ့်စိတ်ရင်းနဲ့ ပြောဖို့လိုအပ်ပါတယ်။ 

၄။ ပြောသင့်တဲ့အချိန်ကို ကြည့်ပါ

အစည်းအဝေးမှာ  တစ်ယောက်ယောက်က presentation လုပ်သွားတယ်ဆိုရင် ကိုယ်က စီနီယာမဟုတ်ဘူး မန်နေဂျာမဟုတ်ဘူးဆိုရင် ထင်မြင်ချက်ကို အရင်ဆုံးမပေးပါနဲ့။ ကိုယ့်ရဲ့ အထက်လူကြီးတွေ ပြောတာကို အရင်စောင့်လိုက်ပါ။ တစ်ခါတစ်လေကျရင်လည်း ကိုယ့်ထက်အရင်မေးတဲ့သူတွေရဲ့ မေးခွန်းတွေထဲမှာ ကိုယ် သေချာနားမလည်လိုက်တာတို့ ကိုယ်သိချင်တာတို့နဲ့ ပတ်သတ်ပြီး သိလိုက်ရနိုင်ပါတယ်။ ကိုယ်မေးချင်တာနဲ့ ပတ်သတ်ပြီး ယုံကြည်မှုရှိတယ်ဆိုတော့မှ ပြောပါ။ 

၅။ အစည်းအဝေးတစ်ခုလုံးကို စိုးမိုးတာမျိုးမလုပ်ပါနဲ့ 

ကိုယ်က အစည်းအဝေးမှာ သိချင်တဲ့ အကြောင်းအရာတွေ ပြောပြပေးချင်တဲ့ ထင်မြင်ချက်တွေအများရှိနေတယ်ဆိုရင်တောင် ကိုယ်ကချည်းပဲ အစည်းအဝေးတစ်ခုလုံးကို စိုးမိုးပြီး ဆွေးနွေးတာမျိုး မလုပ်ပါနဲ့။ ကိုယ်ပြောချင်တာ တစ်ချက်နှစ်ချက်လောက်ပြောပြီးသွားရင် တခြားသူတွေကိုလည်း ပြောခွင့်ပေးလိုက်ပါ။ သူတို့တွေ ပြောတဲ့ အကြောင်းအရာထဲမှာ ကိုယ်ပြောချင်တာတွေလည်း ပါလာနိုင်တယ်လေ။ တခြားသူတွေပြောပြီးသွားတော့မှ ကိုယ် ထပ်ပြောချင်တာကို ပြောလို့ရပါတယ်။

၆။ ငြင်းပယ်မှုတွေကို လျှော့ချပါ 

အစည်းအဝေးမှာ ပြောတဲ့သူရဲ့ အတွေးအခေါ်တွေ အကြံပြုချက်တွေကို သဘောမတူတာမျိုးဖြစ်ခဲ့တယ်ဆိုရင် ကိုယ့်ရဲ့ သဘောမတူညီမှုတွေကို ကောင်းတဲ့ဘက်ကနေ လှည့်ပြောဖို့ဆုံးဖြတ်လိုက်ပါ။ အဲ့ဒီလူကို မှားတယ်လို့ ပြောတာထက် မေးခွန်းလေးမေးလိုက်ပါ။ အဲ့ဒီလိုမျိုး မေးခွန်းမေးလိုက်တာက အဲ့ဒီလူက ပိုပြီး အသေးစိတ်ရှင်းပြခွင့်ပေးလိုက်နိုင်ပါတယ်။ ပြီးတော့ကိုယ့်ဘက်က မှားနေတာလည်း ရှိနိုင်တယ်လေ။ တစ်ဖက်လူရဲ့ အတွေးအခေါ်တွေကို ငြင်းဆန်လိုက်တာထက် ကိုယ့်ရဲ့ အတွေးအခေါ်ကို ပြောပြဆွေးနွေးပြီး အဲ့ဒီ ၂ ခုကို ပေါင်းစပ်ပြီး ပိုကောင်းတဲ့ အတွေးအခေါ်ဖြစ်အောင်စဉ်းစားဆွေးနွေးတာက အကောင်းဆုံးပါပဲ။

New Day Jobs ဆိုတာ အလုပ်အကိုင်ပေါင်းများစွာကို တစ်နေရာတည်းမှာ ရှာဖွေလျှောက်ထားနိုင်တဲ့ အလုပ်အကိုင် website ဖြစ်ပါတယ်။သင့်အတွက် ကောင်းမွန်တဲ့ အခွင့်အလမ်းတွေကို New Day Jobs မှတဆင့် လျှောက်ထားနိုင်ပါတယ်။

Back

You will receive the email for your email confirmation. Please check!